വീടെന്ന അഭിമന്യുവിന്‍റെ സ്വപ്നം സഫലമായി; മുഖ്യമന്ത്രി വീടിന്റെ താക്കോല്‍ കൈമാറി

ഇടുക്കി: അഭിമന്യുവിന്‍റെ വീടെന്ന സ്വപ്നം സഫലമായി. വട്ടവടയില്‍ രാവിലെ നടന്ന ചടങ്ങില്‍ മുഖ്യമന്ത്രി പിണറായി വിജയന്‍ വീടിന്‍റെ താക്കോല്‍ അഭിമന്യുവിന്‍റെ മാതാപിതാക്കള്‍ക്ക് കൈമാറി.

അഭിമന്യുവിന്‍റെ മാതാപിതാക്കളുടെ പേരില്‍ സി പി എം ബാങ്കില്‍ നിക്ഷേപിച്ച 23.75 ലക്ഷം രൂപയുടെ ചെക്കും മുഖ്യമന്ത്രി കൈമാറി.

കൂടാതെ വട്ടവട പഞ്ചായത്ത് സ്ഥാപിച്ച ‘അഭിമന്യു മഹാരാജാസ്’ ലൈബ്രറിയും മുഖ്യമന്ത്രി ഉദ്ഘാടനം ചെയ്തു.

വട്ടവട കൊട്ടക്കന്പൂരിലെ അഭിമന്യുവിന്റെ നിലവിലെ വീടിന് അരക്കിലോമീറ്റര്‍ അകലെയാണ് പുതിയ വീട്. പത്തര സെന്‍റ് ഭൂമിയില്‍ 1,226 ചതുരശ്രയടി വിസ്തീര്‍ണത്തില്‍ എല്ലാ വിധ സൗകര്യങ്ങളോടും കൂടിയാണ് വീട് നിര്‍മിച്ചിരിക്കുന്നത്.

വീടിനും സ്ഥലത്തിനുമായി സി പി എം നാല്പത് ലക്ഷം രൂപയാണ് ചെലവിട്ടത്. വട്ടവട പഞ്ചായത്ത് കെട്ടിടത്തിന്‍റെ മൂന്നാം നിലയിലാണ് അഭിമന്യു സ്മരണാര്‍ത്ഥമുള്ള വായനശാല സജ്ജീകരിച്ചിരിക്കുന്നത്.

അഭിമന്യുവിനെ സ്നേഹിക്കുന്നവരും സുഹൃത്തുക്കളും സമ്മാനിച്ച നാല്‍പതിനായിരത്തോളം പുസ്തകങ്ങളാണ് ലൈബ്രറിയിലുള്ളത്.

വിദ്യാഭ്യാസപരമായി പിന്നില്‍ നില്‍ക്കുന്ന വട്ടവടയെ മുന്നോട്ട് നയിക്കാന്‍ സ്വന്തമായൊരു വായനശാല എന്ന ആവശ്യം അഭിമന്യു അവസാനമായി പങ്കെടുത്ത ഗ്രാമസഭയിലും ഉന്നയിച്ചിരുന്നു.

അഭിമന്യുവിന്റെ പ്രിയപ്പെട്ടവർ ഈ ആഗ്രഹം ഏറ്റെടുത്തപ്പോള്‍ വിശാലമായ വായനശാല വട്ടവടയ്ക്ക് സ്വന്തമായി. കേരളത്തിന് പുറമേ ഇതര സംസ്ഥാനങ്ങളില്‍ നിന്നും വിദേശത്ത് നിന്നുമെല്ലാം ലൈബ്രറിയിലേക്ക് പുസ്തകങ്ങള്‍ എത്തി.