എസ്എസ്എൽസി പ്ലസ് ടു പരീക്ഷ ഫലത്തിന്റെ തീയതി പ്രഖ്യാപിച്ചു. എസ്എസ്എൽസി പരീക്ഷാഫലം മേയ് 20നും ഹയർസെക്കൻഡറി വിദ്യാർത്ഥികളുടെ ഫലം മേയ് 25നും പുറത്തുവിടുമെന്ന് വിദ്യാഭ്യാസ മന്ത്രി വി ശിവൻകുട്ടി അറിയിച്ചു.
4,19,362 റഗുലർ വിദ്യാർഥികളും 192 പ്രൈവറ്റ് വിദ്യാർഥികളുമാണ് ഇത്തവണ എസ്എസ്എൽസി പരീക്ഷ എഴുതിയത്. ഹയർ സെക്കണ്ടറി പരീക്ഷ ഫലത്തിനായി കാത്തിരിക്കുന്നത് 4,42,062 വിദ്യാർഥികളുമാണ്.
ഇതിനിടെ അടുത്ത മാസം ഒന്നാം തിയതി സ്കൂൾ തുറക്കുന്നതിന്റെ ഭാഗമായുള്ള മുന്നൊരുക്കങ്ങൾ പുരോഗമിക്കുകയാണ്. എല്ലാ വിദ്യാഭ്യാസ സ്ഥാപനങ്ങളിലെയും ഓഫീസര്‍മാർക്ക് വിദ്യാഭ്യാസ മന്ത്രി വിളിച്ച് ചേർത്ത യോഗത്തിൽ നിർദേശം നൽകി.
ജൂൺ ഒന്നിന് നടക്കുന്ന പ്രവേശനോത്സവത്തിന്റെ സംസ്ഥാന തല ഉദ്ഘാടനം തിരുവനന്തപുരം മലയൻകീഴ് ഗവൺമെന്റ് ബോയ്സ് എൽ പി എസിൽ മുഖ്യമന്ത്രി പിണറായി വിജയൻ നിർവഹിക്കും. കൈറ്റ് വിക്ടെഴ്സ് ചാനൽ വഴി എല്ലാ സ്‌കൂളിലും ഉദ്ഘാടന ചടങ്ങിന്റെ തത്സമയം പ്രദർശനം നടത്താനും നിർദേശം നൽകി. അതിനുശേഷം ഓരോ സ്കൂളുകളിലും ജനപ്രതിനിധികൾ അടക്കമുള്ളവരുടെ നേതൃത്വത്തിൽ പ്രാദേശിക ചടങ്ങുകൾ നടക്കും.
