ദേശാഭിമാനിയും ഇവന്റ് മാനേജ്‌മെന്റ് കമ്പനി തുടങ്ങുന്നു. വരുമാന വര്‍ധനയ്ക്ക് പുതിയ മാര്‍ഗങ്ങള്‍ തേടുന്നതിന്റെ ഭാഗമായാണ് തീരുമാനം. ദേശാഭിമാനിയുടെ നിര്‍ദേശത്തിന് സിപിഎം സംസ്ഥാന കമ്മിറ്റി അംഗീകാരം നല്‍കി. ഇവന്റ് മാനേജ്‌മെന്റ് കമ്പനി തുടങ്ങുന്ന കാര്യം പാര്‍ട്ടി സംസ്ഥാന സെക്രട്ടറിയേറ്റ് അംഗവും, ദേശാഭിമാനി ജനറല്‍ മാനേജറുമായ കെ ജെ തോമസ് സ്ഥിരീകരിച്ചു. കഴിഞ്ഞ സംസ്ഥാന കമ്മിറ്റിയാണ് ദേശാഭിമാനിയുടെ നിര്‍ദേശത്തിന് അംഗീകാരം നല്‍കിയത്.
ദേശാഭിമാനിയുടെ പരിപാടികള്‍ മാത്രമല്ല പരമാവധി സര്‍ക്കാര്‍ പരിപാടികള്‍ കൂടി ഏറ്റെടുത്ത് നടത്താന്‍ കഴിയുന്ന തരത്തില്‍ ഗ്രൂപ്പിനെ വികസിപ്പിക്കുക എന്നതാണ് ലക്ഷ്യമിടുന്നത്. ഇവയ്ക്ക് പുറമെ സ്വകാര്യ പരിപാടികളും ഏറ്റെടുക്കും. പാർട്ടി സംസ്ഥാന കമ്മിറ്റി അംഗീകാരം നൽകിയതോടെ തുടർ ചർച്ചകൾ പാർട്ടിയുടെ വിവിധ കമ്മിറ്റികളിൽ നടത്തി, തീരുമാനവുമായി മുന്നോട്ടുപോകും.
ഇവന്റ് ഗ്രൂപ്പ് സാധ്യമായാല്‍ ഭരണത്തിന്റെ കൂടി പശ്ചാത്തലത്തില്‍ പരമാവധി സര്‍ക്കാര്‍ പരിപാടികള്‍ ഏറ്റെടുത്ത് നടത്താന്‍ സാധിക്കുമെന്നും വിലയിരുത്തലുണ്ട്. . കൂടാതെ സിപിഎമ്മിന്റെയും എസ്എഫ്‌ഐ, ഡിവൈഎഫ്‌ഐ മറ്റ് ബഹുജന സംഘടനകള്‍ എന്നിവയുടെയും സംഘടനാ സംവിധാനം ഉപയോഗിച്ച് ദേശാഭിമാനി വെബ് എഡിഷന് കൂടുതല്‍ പ്രചാരം നല്‍കാനുള്ള സംവിധാനങ്ങള്‍ ആലോചിക്കണമെന്നും തീരുമാനമുണ്ട്.
