നൊച്ചാട്ട് യു ഡി എഫ് പ്രതിഷേധ പ്രകടനത്തിന് നേരെ പെട്രോൾ ബോംമ്പേറ്; പോലീസ് ടിയർ ഗ്യാസ് പ്രയോഗിച്ചു. പ്രദേശത്ത് സംഘർഷാവസ്ഥ
പേരാമ്പ്ര :നൊച്ചാട് ചാത്തോത്ത് താഴെ കഴിഞ്ഞ ദിവസം കോൺഗ്രസ് ഓഫീസ് എറിഞ്ഞു തകർത്തതിൽ പ്രതിഷേധിച്ച് യു ഡി എഫ് നടത്തിയ പ്രതിഷേധ പ്രകടനത്തിനു നേരെയും സി പി എം ,ഡി വൈ എഫ് ഐ പ്രവർത്തകർ സംഘടിച്ച് എത്തിയത് സംഘർഷത്തിൽ കലാശിച്ചു .സംഘർഷത്തെ തുടർന്ന് ലീഗ് ഓഫീസിനു നേരെ ആക്രമണം നടന്നു. യു ഡി എഫ് നടത്തിയ പ്രതിഷേധ പ്രകടനം മാവട്ടയിൽ താഴ സമാപിക്കാൻ ഇരിക്കേ നൂറോളം സി പി എം, ഡിവൈഎഫ്ഐ പ്രവർത്തകർ പ്രകോപന മുദ്രാവാക്യം മുഴക്കി യു ഡി എഫ് പ്രകടനത്തെ ആക്രമിക്കുകയായിരുന്നുവെന്ന് യു ഡി എഫ് നേതൃത്വം ആരോപിച്ചു.
യു ഡി എഫ് പ്രകടനത്തുന്നു നേരെ കല്ലും പെട്രോൾ ബോംബും എറിഞ്ഞതോടെ സംഘർഷം കനത്തു. ഇതോടെ പോലീസ് ടിയർ ഗ്യാസ് പൊട്ടിച്ചു. ഇരു വിഭാഗത്തെയും പിരിച്ചുവിടാൻ ലാത്തി വീശി.തുടർന്ന് ചിതറി ഓടിയ പ്രവർത്തകർ വ്യാപകമായി കല്ലേറു നടത്തി. പോലീസ് ലാത്തി ചാർജിലും സംഘർഷത്തിലും നിരവധി പേർക്ക് പരിക്കുണ്ട്. മൂന്നു പോലീസുകാർക്കും പരിക്കേറ്റു. പ്രദേശത്ത് സംഘർഷാവസ്ഥ നിലനിൽക്കുകയാണ്.
