കൊയിലാണ്ടി: കൂടുതല്‍ ട്രെയിനുകള്‍ക്ക് കൊയിലാണ്ടി റെയില്‍വേ സ്‌റ്റേഷനില്‍ സ്‌റ്റോപ്പ്
അനുവദിക്കണമെന്ന ആവശ്യം ഉന്നയിച്ചു മലബാര്‍ റെയില്‍വേ ഡെവലപ്പ്‌മെന്റ് കൗണ്‍സില്‍ കോഴിക്കോടിന്റെ (മാർഡാക്ക്) ആഭിമുഖ്യത്തിൽ ഗാന്ധി ജയന്തി ദിനത്തിൽ കൊയിലാണ്ടിറെയിൽവേ സ്റ്റേഷൻ റോഡ് പരിസരത്തു നടത്തിയ ചടങ്ങിൽ തുറമുഖ പുരാവസ്തു വകുപ്പ് മന്ത്രി അഹമ്മദ്‌ ദേവർ കോവിൽ ഉദ്ഘാടനം ചെയ്തു. സ്റ്റേഷനിലെ ശുചീകരണ പാർസൽ തൊഴിലാളികളെ മന്ത്രി സദസ്സിൽ വെച്ച് ആദരിച്ചു.
ജനകീയ ഒപ്പ് ശേഖണം മുനിസിപ്പൽ കൗൺസിലർ വി പി ഇബ്രാഹിം കുട്ടി ആദ്യ ഒപ്പ് വെച്ച് ഉദ്ഘാടനം നിർവഹിച്ചു. യോഗത്തിൽ മാർഡാക്ക് പ്രസിഡന്റ്‌ എംപി മൊയ്‌തീൻ കോയ അധ്യക്ഷത വഹിച്ചു. അന്യ സംസ്ഥാനങ്ങളിലേക്ക് നിരവധി പേര്‍ യാത്രചെയ്യുന്ന കൊയിലാണ്ടി സ്‌റ്റേഷനില്‍ കുര്‍ള,കണ്ണൂര്‍ എറണാകുളം ഇന്റര്‍ സിറ്റി ,ചെന്നൈ മംഗ്ലൂര്‍ വെസ്റ്റ് കോസ്റ്റ് , കോയമ്പത്തൂര്‍ ഇന്റര്‍ സിറ്റി, മംഗളൂര്‍ചെന്നൈ സൂപ്പര്‍ ഫാസ്റ്റ്, കൊറോണ സമയത്ത് പിന്‍വലിച്ച ആഴ്ചകളില്‍ സർവീസ് നടത്തുന്ന നഗര്‍ കോവില്‍ ഗാന്ധിദാം എക്‌സ്പ്രസ്സ്, തിരുവനതപുരം വാരവല്‍ എക്‌സ്പ്രസ്സ്, മാംഗ്ലൂര്‍ കോയമ്പത്തൂര്‍ എക്‌സ്പ്രസ്സ്, കൊച്ചുവേളി എക്‌സ്പ്രസ്സ് എന്നീ വണ്ടികൾ പുനഃസ്ഥാപിക്കുക, തൽകാൽ റിസർവേഷൻ ടിക്കറ്റ് സ്റ്റാഫിനെ നിയമിക്കുക തുടങ്ങി വിവിധ ആവശ്യങ്ങള്‍ ഉന്നയിച്ചാണ് കേന്ദ്ര റെയിൽവേ മന്ത്രിക്കും റെയിൽവേ ബോര്ഡ് ചെയർമാനും നിവേദനം സമര്‍പ്പിക്കുന്നത്.
ഒക്ടോബർ 10ന് മുമ്പായി ഒപ്പ് ശേഖരണം പൂർത്തിയാക്കും. പൊതുജനങ്ങളും യാത്രക്കാരും ജന പ്രതിനിധികളും പങ്കാളികളാവും. ചടങ്ങിൽ വാർഡ് കൌൺസിലർ എ ലളിത, കൊയിലാണ്ടി പ്രസ്സ് ക്ലബ്‌ സെക്രെട്ടറി എ സജീവ് കുമാർ, കെ കെ ഫാറൂഖ്, കെ കെ നിയാസ് സകരിയ, പള്ളി കണ്ടി ശങ്കരൻ, നടുവണ്ണൂർ വിജയൻ, കൊല്ലം കണ്ടി സന്തോഷ്‌, പേരവച്ചേരി എസ് അനീഷ് എന്നിവർ സംസാരിച്ചു. മർഡാക് സെക്രെട്ടറി കെഎം സുരേഷ് ബാബു സ്വാഗതവും എംകെ ഉമ്മർ നന്ദിയും പറഞ്ഞു.
