അമേരിക്കയില്‍ വെച്ച് ആക്രമണത്തിനിരയായ സല്‍മാന്‍ റുഷ്ദിയുടെ നില ഗുരുതരമായി തുടരുന്നു. പരിപാടി നടക്കുന്നതിനിടെ പെട്ടെന്ന് അക്രമി സ്റ്റേജിലേക്ക് കയറി ആക്രമിക്കുകയായിരുന്നുവെന്ന് ദൃക്‌സാക്ഷികള്‍ പറയുന്നു.
20 സെക്കന്റോളം അക്രമി റുഷ്ദിയെ ആക്രമിച്ചു. കറുത്ത വസ്ത്രവും കറുത്ത മാസ്‌കും ധരിച്ചാണ് അക്രമി എത്തിയതെന്ന് ദൃക്‌സാക്ഷിയായ കാതലിന്‍ ജോണ്‍സ് പറഞ്ഞു. 2500ല്‍പ്പരം ആളുകളാണ് ഓഡിറ്റോറിയത്തില്‍ ഉണ്ടായിരുന്നത്. ഹെലികോപ്റ്ററില്‍ ഉടനെ തന്നെ അദ്ദേഹത്തെ ആശുപത്രിയിലേക്ക് കൊണ്ടുപോകുകയും ചെയ്തു.
പടിഞ്ഞാറന്‍ ന്യൂയോര്‍ക്കിലെ ഷൗതൗക്വ ഇന്‍സ്റ്റിറ്റ്യൂട്ടില്‍ പ്രസംഗിക്കാനെത്തിയപ്പോഴാണ് സംഭവം. റുഷ്ദിയെ വേദിയിലേക്ക് സ്വാഗതം ചെയ്തതിന് പിന്നാലെ ഒരാള്‍ പാഞ്ഞടുത്ത് ആക്രമിക്കുകയായിരുന്നു. കഴുത്തിനാണ് പരിക്കേറ്റത്. റുഷ്ദി നിലത്തുവീണശേഷമാണ് അക്രമി പിന്‍വാങ്ങിയത്. പ്രതിയെ അറസ്റ്റുചെയ്തു.
