സാന്റ് ബാങ്ക്‌സ് അഴിമുഖത്തിനു സമീപം കല്ലുമ്മക്കായ പറിക്കാന്‍ പോയി കടലില്‍ കാണാതായ യുവാവ് മരിച്ചു
വടകര: ടൂറിസ്റ്റ് കേന്ദ്രമായ അഴിത്തല സാന്റ് ബാങ്ക്‌സ് അഴിമുഖത്തിനു സമീപം കല്ലുമ്മക്കായ പറിക്കാന്‍ പോയി കടലില്‍ കാണാതായ യുവാവ് മരിച്ചു. ചോമ്പാല മുക്കൂടത്തില്‍ സിദ്ദീഖാണ് (47) മരിച്ചത്. കോസ്റ്റല്‍ പോലീസും ഫയര്‍ ആന്റ് റെസ്‌ക്യൂ മുങ്ങല്‍ വിദഗ്ധരും മത്സ്യതൊഴിലാളികളും ചേര്‍ന്ന് നടത്തിയ തെരച്ചലിൽ പത്ത് മണിയോടെയാണ് മൃതദേഹം കിട്ടിയത്.
ഇന്ന് രാവിലെ നാല് പേരടങ്ങിയ സംഘമാണ് കല്ലുമ്മക്കായ പറിക്കാന്‍ പോയത്. മുമ്പ് തീരക്കടലില്‍ മറിഞ്ഞ ടഗ്ഗിന്റെ അവശിഷ്ടങ്ങളില്‍ വന്‍തോതില്‍ കല്ലുമ്മക്കായ വളരുന്നുണ്ട്. ഇത് പറിക്കുന്നതിനുള്ള ശ്രമത്തിനിടയില്‍ സിദ്ദീഖ് ഇതിനകത്ത് കുടുങ്ങിപ്പോവുകയായിരുന്നു. കൂടെയണ്ടായിരുന്നവര്‍ വിവരം അറിയിച്ചതിനെ തുടര്‍ന്ന് കോസ്റ്റല്‍ പോലീസും മറ്റുള്ളവരും രക്ഷാപ്രവര്‍ത്തനത്തിനെത്തി. തെരച്ചലിനിടയില്‍ ടഗ്ഗിനകത്ത് നിന്ന് മൃതദേഹം കണ്ടെത്തുകയായിരുന്നു. ആദ്യം വടകര സിഎം ഹോസ്പിറ്റലിലും, പിന്നീട് പോസ്റ്റ്മോർട്ടം ഇൻക്വസ്റ്റ് നടപടിക്കായി വടകര ഗവൺമെൻറ് ആശുപത്രിയിലേക്ക് മാറ്റി.
പൊലീസ് നടപടിക്രമത്തിനുശേഷം മൃതദേഹം പോസ്റ്റ് മോർട്ടം നടത്തി ബന്ധുക്കൾക്ക് വിട്ടുകൊടുക്കും. മൂസയാണ് പിതാവ്.
