സ്മാര്‍ട്ട് മീറ്റര്‍ പദ്ധതി താല്‍കാലികമായി നിര്‍ത്തിവക്കാന്‍ കെഎസ്ഇബിക്ക് നിര്‍ദ്ദേശം
സ്മാര്‍ട്ട് മീറ്റര്‍ പദ്ധതി താല്‍കാലികമായി നിര്‍ത്തിവക്കാന്‍ കെഎസ്ഇബിക്ക് നിര്‍ദ്ദേശം. തൊഴിലാളി സംഘടനകളുടെ ശക്തമായ എതിര്‍പ്പിനെ തുടര്‍ന്നാണ് സ്മാര്‍ട്ട് മീറ്റര്‍ പദ്ധതി താല്‍കാലികമായി നിര്‍ത്തിവക്കാന്‍ കെഎസ്ഇബിക്ക് നിര്‍ദ്ദേശം നൽകിയിരിക്കുന്നത്. പദ്ധതി നടപ്പാക്കുന്നതിനെക്കുറിച്ച് പഠിച്ച വിദഗ്ദ്ധ സമിതി റിപ്പോര്‍ട്ടില്‍ സര്‍ക്കാര്‍ തീരുമാനമെടുക്കുന്നതുവരെ പ്രവര്‍ത്തനങ്ങള്‍ നിർത്തിവയ്ക്കാന്‍ ഊര്‍ജ വകുപ്പ് അഡിഷണല്‍ ചീഫ് സെക്രട്ടറി കെ ആര്‍ ജ്യോതിലാൽ നിര്‍ദ്ദേശിച്ചു.
തൊഴിലാളി നേതാക്കളുടെ യോഗത്തില്‍ മന്ത്രി കെ. കൃഷ്ണന്‍കുട്ടിയാണ് ഇക്കാര്യമറിയിച്ചത്. പദ്ധതി നടത്തിപ്പിന് സംസ്ഥാനത്തിന്റെ അധിക കടമെടുപ്പുമായി ബന്ധമുണ്ടോ, ടോട്ടക്സ് മാതൃകയില്‍ നടപ്പാക്കിയില്ലെങ്കില്‍ കേന്ദ്രസഹായം നഷ്ടപ്പെടുമോ തുടങ്ങിയ കാര്യങ്ങള്‍ സര്‍ക്കാര്‍ പരിശോധിച്ച ശേഷം തുടര്‍നടപടി ആലോചിക്കുമെന്ന് മന്ത്രി പറഞ്ഞു.
ആദ്യഘട്ടമായി 37ലക്ഷം സ്മാര്‍ട്ട് മീറ്റര്‍ സ്ഥാപിക്കാനായിരുന്നു തീരുമാനം. പദ്ധതി നടപ്പാക്കാന്‍ കെഎസ്ഇബി ടെന്‍ഡര്‍ ക്ഷണിക്കുകയും അതിന്റെ ഇവാല്യുവേഷന്‍ കഴിഞ്ഞ 29ന് തുടങ്ങുകയും ചെയ്തിരുന്നു. ഉത്തരവ് വന്നതോടെ നടപടികള്‍ നിര്‍ത്തിവച്ചു.
