പത്മശ്രീ ഗുരു ചേമഞ്ചേരി സ്ഥാപിച്ച ചേലിയ കഥകളി വിദ്യാലയത്തിൽ സൗജന്യ കഥകളി പരിശീലന കോഴ്സ് പുതിയ ബാച്ചിലേക്ക് അപേക്ഷകൾ ക്ഷണിച്ചു. രണ്ടു വർഷമാണ്‌ കോഴ്സ് കാലാവധി. കഥകളി വേഷം, ചെണ്ട, സംഗീതം, ചുട്ടിയും കോപ്പു നിർമ്മാണവും എന്നിങ്ങനെ കഥകളിയുമായി ബന്ധപ്പെട്ട എല്ലാ മേഖലകളിലും പഠനവും പരിശീലന പരിപാടികളും നടക്കും.
നാലു സെമസ്റ്ററുകളിലായാണ് മൊത്തം സിലബസ് വിഭജിച്ചിരിക്കുന്നത്. ഓരോ സെമസ്റ്ററിലും തിയറിയോടൊപ്പം പ്രായോഗിക കാര്യങ്ങളിലും പരീക്ഷ നടക്കും. സെമസ്റ്റർ പരീക്ഷ വിജയകരമായി പൂർത്തിയാക്കുന്നവർക്ക് അടുത്ത സെമസ്റ്ററിലേക്ക് പ്രവേശനം ലഭിക്കും. സെമസ്റ്റർ പരീക്ഷയിൽ പരാജയപ്പെടുന്നവർക്കായി SAS (Save a
semester) പരീക്ഷകൾ ഉണ്ടാവും.
ശനി, ഞായർ ദിവസങ്ങളിൽ 3 മണിക്കൂർ ,തിങ്കൾ ,ചൊവ്വ ദിവസങ്ങളിൽ രണ്ടു മണിക്കൂർ എന്നിങ്ങനെ ആഴ്ചയിൽ 10 മണിക്കൂർ പഠന പരിശീലന പരിപാടികൾ ഉണ്ടാവുന്നതാണ്. ഒരു സെമസ്റ്ററിൽ പരീക്ഷകൾ ഉൾപ്പടെ 240 മണിക്കൂർ ക്ലാസ് വിദ്യാർത്ഥികൾക്ക് ലഭിക്കുന്നതാണ്. നാലു സെമസ്റ്ററുകളിലായി 960 മണിക്കൂർ ക്ലാസുകളും
മെയ് മാസം കഥകളി പഠനശിബിരത്തിലൂടെ 40 മണിക്കൂർ ക്ലാസും ഉൾപ്പടെ രണ്ടു വർഷം 1000 മണിക്കൂർ സമയം ഒരു വിദ്യാർത്ഥിക്ക് കോഴ്സിലൂടെ പരിശീലനം ലഭിക്കും.
കേന്ദ്ര സർക്കാറിൻ്റെ സാംസ്കാരിക വകുപ്പിൻ്റെ അംഗീകാരം കോഴ്സിനുണ്ട്. കാലാവധി വിജയകരമായി പൂർത്തിയാക്കുന്ന വർക്ക് സർട്ടിഫിക്കറ്റുകൾ നല്കുന്നതാണ്. ഈ വർഷത്തെ പുതിയ ബാച്ച് മെയ് 28 ഞായറാഴ്ച ആരംഭിക്കുന്നു. വൈകീട്ട് 4 മണിക്ക് ചേലിയ കഥകളി വിദ്യാലയത്തിൽ കോഴ്സിൻ്റെ ഔപചാരികമായ ഉദ്ഘാടനം നടക്കുന്നു.
കോഴ്സിൻ്റെ ഭാഗമാവാൻ ആഗ്രഹിക്കുന്നവർ മെയ് 28 ഞായറാഴ്ച 3 മണിക്ക് ചേലിയ കഥകളി വിദ്യാലയത്തിൽ എത്തേണ്ടതാണ്.രക്ഷിതാക്കളുടെ സാന്നിധ്യം നിർബന്ധമാണ്. പ്രായ പരിധി 10 വയസ്സിനു മുകളിൽ 25 വയസ്സു വരെ. കൂടുതൽ വിവരങ്ങൾക്ക് 97 45 86 62 60, 94 46 25 85 85 ഈ നമ്പറിൽ ബന്ധപ്പെടാവുതാണ്.
