ഹൈക്കോടതിയിലെ പ്രവേശനത്തിന് കര്‍ശന നിയന്ത്രണം ഏര്‍പ്പെടുത്തി. അടുത്തിടെ ഉണ്ടായ സുരക്ഷാ വീഴ്ചയെ തുടര്‍ന്നാണ് നിയന്ത്രണം.ഹൈക്കോടതി രജിസ്ട്രാര്‍ ജനറല്‍ പി കൃഷ്ണകുമാറാണ് നോട്ടീസ് പുറപ്പെടുവിച്ചത്.
കക്ഷികളോടൊപ്പം വരുന്നവര്‍ക്ക് ഹൈക്കോടതിയില്‍ പ്രവേശനമില്ല. അഭിഭാഷകരും ക്ലാര്‍ക്കുകളും ഹൈക്കോടതി ജീവനക്കാരും ഐഡി കാര്‍ഡ് ധരിച്ചുവേണം ഹൈക്കോടതിയില്‍ പ്രവേശിക്കാന്‍. സര്‍ക്കാര്‍ ഉദ്യോഗസ്ഥര്‍ ഐഡി കാര്‍ഡും സേനാംഗങ്ങള്‍ യൂണിഫോമും ധരിച്ചിരിക്കണം. ഗൗണ്‍ ധരിക്കാതെ എത്തുന്ന അഭിഭാഷകര്‍ പ്രവേശന കവാടത്തില്‍ ഐഡി കാര്‍ഡ് കാണിക്കണം. ഗൗണ്‍ ധരിച്ചെത്തുന്ന അഭിഭാഷകരെ സംശകരമായ സാഹചര്യത്തില്‍ മാത്രം പരിശോധിച്ചാല്‍ മതിയെന്നാണ് നോട്ടീസില്‍ പറയുന്നത്.
അടുത്തിടെ ഹൈക്കോടതിയില്‍ ആത്മഹത്യാശ്രമം നടന്നതാണ് സുരക്ഷ ശക്തമാക്കാന്‍ കാരണമായത്. ഹേബിയസ് കോര്‍പ്പസ് ഹര്‍ജിയില്‍ കോടതിയില്‍ ഹാജരായ പെണ്‍കുട്ടി വീട്ടുകാരുടെ കൂടെ പോകാന്‍ തീരുമാനിച്ചതിനെ തുടര്‍ന്ന് യുവാവ് കോടതി വരാന്തയില്‍ കയ്യില്‍ കരുതിയിരുന്ന കത്തി ഉപയോഗിച്ച് ജീവനൊടുക്കാന്‍ നോക്കിയതിനെ തുടര്‍ന്നാണ് നടപടി.
