തിരുവനന്തപുരം: സംസ്ഥാനത്ത് കോളേജ് അധ്യാപക നിയമനത്തിന് നെറ്റ് നിർബന്ധമല്ലെന്ന ഉത്തരവ് ഉന്നത വിദ്യാഭ്യാസ വകുപ്പ് റദ്ദാക്കി. സെറ്റ് പാസായവരെയും അസിസ്റ്റന്റ് പ്രൊഫസർമാരായി നിയമിക്കാൻ ചട്ടം ഭേദഗതി ചെയ്യാനായി ഉന്നത വിദ്യാഭ്യാസ വകുപ്പ് അടുത്തിടെ പുറപ്പെടുവിച്ച ഉത്തരവാണ് റദ്ദാക്കിയത്. അസിസ്റ്റന്റ് പ്രൊഫസർമാരെ നേരിട്ടു നിയമിക്കാൻ നെറ്റിനുപുറമേ, സംസ്ഥാനതല യോഗ്യതാപരീക്ഷകൾ പാസായവരെയും പരിഗണിക്കാമെന്നാണ യു ജി സി വ്യവസ്ഥയുടെ ചുവടുപിടിച്ചായിരുന്നു സംസ്ഥാന സർക്കാരിന്റെ നീക്കം. സെറ്റ് പരീക്ഷയും യു ജി സി അംഗീകൃത പരീക്ഷയും തമ്മിൽ തെറ്റിദ്ധരിപ്പിക്കപ്പെടാൻ ഇടയുള്ളതിനാൽ മുൻ ഉത്തരവ് റദ്ദാക്കുന്നതായി ഉന്നതവിദ്യാഭ്യാസവകുപ്പ് അറിയിച്ചു.
പ്രത്യേകം യോഗ്യതാപരീക്ഷ നടത്തുന്ന സംസ്ഥാനങ്ങൾക്കു മാത്രം ബാധകമായിട്ടുള്ളതായിരുന്നു യു ജി സിയുടെ ഭേദഗതി. കേരളത്തിൽ അത്തരമൊരു പരീക്ഷ നടക്കാത്ത പശ്ചാത്തലത്തിൽ ഹയർസെക്കൻഡറി നിയമനത്തിന് നടത്തുന്ന സെറ്റ് പരീക്ഷയെ കോളജ് അധ്യാപക യോഗ്യതയായി പരിഗണിക്കാനായിരുന്നു സർക്കാർ നീക്കം.
