കനത്ത മഴ: മഹാരാഷ്ട്രയിൽ 16 പേർ മരിച്ചു, ട്രയിനുകൾ റദ്ദാക്കി, ഇന്ന് പൊതു അവധി

കല്യാൺ ടൗണിൽ കെട്ടിടം തകർന്നു; ആളപായമില്ല

കല്യാൺ ടൗണിൽ കനത്തമഴയ്ക്കിടെ മൂന്നു നില കെട്ടിടത്തിന്റെ ഒരു ഭാഗം തകർന്നുവീണു. ഇന്നലെ ഉച്ചകഴിഞ്ഞ് മൂന്നോടെയാണ് സംഭവം. ആർക്കും പരുക്കില്ല. അപകടാവസ്ഥയിലുള്ള കെട്ടിടങ്ങളുടെ പട്ടികയിൽപെട്ട കെട്ടിടത്തിലെ താമസക്കാരെ നേരത്തെ ഒഴിപ്പിച്ചിരുന്നതിനാൽ വൻദുരന്തം ഒഴിവായി. കല്യാൺ ടൗണിലും താനെ ജില്ലയുടെ മറ്റു ഭാഗങ്ങളിലും ഞായറാഴ്ച മുതൽ കനത്ത മഴ തുടരുകയാണ്.

ജാൽനയിൽ റോഡ് ഒഴുകിപ്പോയി

പേമാരിയെ തുടർന്ന് റോഡിന്റെ ഭാഗം ഒഴുകിപ്പോയി. വൻ ദുരന്തം ഒഴിവായി.  ജാൽന മേഖലയിലിൽ ഇന്നും ശക്തമായ മഴ തുടരുകയാണ്. പ്രമുഖ റോഡിന്റെ  വലിയൊരു ഭാഗമാണ് വെള്ളത്തിന്റെ കുത്തൊഴുക്കിൽ തകർന്നത്. ഒരു മോട്ടോർ ബൈക്ക്, കാർ എന്നിവ അത്ഭുതകരമായി രക്ഷപ്പെട്ടു.  ഒഴുക്കിന്റെ സമയത്ത് വാഹനങ്ങൾ സംഭവസ്ഥലത്ത് ഇല്ലാഞ്ഞതാണ്  അപകടം ഒഴിവാക്കിയതെന്നു പൊലീസ് വെളിപ്പെടുത്തി.

ബിഎംസിയുടെ മഴക്കാല മുന്നൊരുക്കങ്ങൾ വെള്ളത്തിലായി

മഴക്കാല മുന്നൊരുക്കങ്ങൾ സംബന്ധിച്ച ബിഎംസിയുടെ അവകാശവാദങ്ങൾ കാലവർഷത്തുടക്കത്തിൽ തന്നെ ഒലിച്ചുപൊയി. മഴവെള്ളത്തിന്റെ സുഗമസഞ്ചാരത്തിന് നഗരത്തിലെ ഓവുചാൽസംവിധാനം നന്നാക്കുന്നതിന് 35 കോടിയിലേറെ രൂപയാണ് ബിഎംസി ചെലവഴിച്ചത്. ഓടകളിലെ മാലിന്യം നീക്കുകയാണ് പ്രധാന ദൗത്യം. എന്നാൽ,  കോരിയെടുക്കുന്ന മാലിന്യങ്ങൾ നീക്കം ചെയ്യാതെ സമീപത്തു തന്നെ നിക്ഷേപിക്കുന്നതിനാൽ മഴയത്തു വീണ്ടും ഓടകളിലേക്കു തന്നെ ഒലിച്ചിറങ്ങുന്നു. ബിഎംസിയുടെ മഴക്കാലമുന്നൊരുക്കങ്ങളിലും അഴിമതിയാണെന്ന് കോൺഗ്രസ് ആരോപിച്ചിരുന്നു.  വഡാല, ഹിന്ദ്മാത, പരേൽ, ലാൽബാഗ്, സേനാപാതി ബാപ്പഡ് റോഡ് തുടങ്ങിയ മേഖലകളിൽ ഇന്നലെ കണ്ട വെള്ളക്കെട്ട് ഈ വിമർശനത്തെ ശരിവയ്ക്കുന്നു. വഡാലയിലും ചെമ്പൂരിലും വീടുകളിൽ വരെ വെള്ളം കയറിയത് ജനങ്ങളെ ദുരിതത്തിലാക്കി.

അതേസമയം, കാലാവസ്ഥാ വ്യതിയാനവും ഭൂപ്രകൃതിയുമാണ് വെള്ളക്കെട്ടിന് ഇടയാക്കിയതെന്നായിരുന്നു ഇന്നലെ ബിഎംസി കമ്മിഷണറുടെ ന്യായം. വെസ്റ്റേൺ എക്‌സ്പ്രസ് വേയിൽ വെള്ളക്കെട്ടിനേക്കാൾ റോഡുകളിലെ കുണ്ടുംകുഴിയുമാണ് ഇന്നലെ തങ്ങളെ വലച്ചതെന്ന്  യാത്രക്കാരുടെ സാക്ഷ്യം റോഡുകളിലെ അറ്റകുറ്റപ്പണി സംബന്ധിച്ച അവകാശവാദങ്ങളെയും പൊളിക്കുന്നു.