സംസ്ഥാന ആരോഗ്യ വകുപ്പ് നടപ്പിലാക്കിയ ‘അല്പം ശ്രദ്ധ ആരോഗ്യം ഉറപ്പ്’ എന്ന ക്യാമ്പയിന് മികച്ച നേട്ടം കൈവരിച്ചു
സംസ്ഥാന ആരോഗ്യ വകുപ്പ് നടപ്പിലാക്കിയ ‘അല്പം ശ്രദ്ധ ആരോഗ്യം ഉറപ്പ്’ എന്ന ക്യാമ്പയിന് മികച്ച നേട്ടം കൈവരിച്ചു. സംസ്ഥാന വ്യാപകമായി 50 ലക്ഷത്തിലധികം പേരെ ജീവിത ശൈലീ രോഗങ്ങള് നിയന്ത്രിക്കുന്നതിന്റെ ഭാഗമായി വീട്ടിലെത്തി രോഗ നിര്ണയ സ്ക്രീനിംഗ് നടത്തിയതായി ആരോഗ്യ വകുപ്പ് മന്ത്രി വീണാ ജോര്ജ് അറിയിച്ചു. 6 മാസം കൊണ്ടാണ് ഈ നേട്ടം കൈവരിക്കാനായത്. ആരോഗ്യ വകുപ്പിന്റെ ഒത്തൊരുമിച്ച പ്രവര്ത്തനം കൊണ്ടാണ് കുറഞ്ഞ കാലയളവ് കൊണ്ട് ഈ നേട്ടം കൈവരിക്കാനായതെന്നും മന്ത്രി വ്യക്തമാക്കി.ഇതിന് പിന്നില് പ്രവര്ത്തിച്ച എല്ലാ ആരോഗ്യ പ്രവര്ത്തകരേയും പഞ്ചായത്തുകളേയും മന്ത്രി അഭിനന്ദിച്ചു.
ഇ ഹെല്ത്ത് രൂപകല്പ്പന ചെയ്ത ശൈലി ആപ്പിന്റെ സഹായത്തോടെ ആരോഗ്യ പ്രവര്ത്തകര് നേരിട്ട് വീട്ടിലെത്തിയാണ് സ്ക്രീനിംഗ് നടത്തുന്നത്. ഇത്തരത്തില് ശേഖരിക്കുന്ന വിവരങ്ങള് തത്സമയം ആരോഗ്യ വകുപ്പിനറിയാനും തുടര്നടപടികള് സ്വീകരിക്കാനും ആവശ്യമുള്ളവര്ക്ക് സൗജന്യ രോഗ നിര്ണയവും ചികിത്സയും ലഭ്യമാക്കാനും സഹായിക്കുന്നു. കര്മ്മ പദ്ധതി ആര്ദ്രം മിഷന് വഴിയാണ് ഇത് നടപ്പിലാക്കി വരുന്നത്. ഇതിനായി ശൈലി ആപ്പ് രൂപപ്പെടുത്തുന്ന വേളയില് മന്ത്രിയുടെ നിര്ദേശ പ്രകാരം ക്യാന്സര് രോഗ നിയന്ത്രണം, പാലിയേറ്റീവ് കെയര് എന്നീ മേഖലകളെ കൂടി പദ്ധതിയില് ഉള്പ്പെടുത്തിയാണ് സ്ക്രീനിംഗ് നടത്തിയത്.