കൊയിലാണ്ടി:പുളിയഞ്ചേരി കെ.ടി ശ്രീധരൻ സ്മാരക വായനശാല സംഘടിപ്പിച്ച സോക്കർ നൈറ്റ് ഫുട്ബോൾ മൽസരം സമാപിച്ചു.വാശിയേറിയ മൽസരത്തിൽ കൊല്ലം ദിവ്യ കൂൾ ബാർ വിജയിച്ചു.
രാത്രി വൈകി മത്സരം പുരോഗമിച്ചപ്പോഴും ഫുട്ബോൾ പ്രേമികൾ ആവേശത്തിമിർപ്പിൽ കളി കാണാൻ ഗാലറിയിൽ ഉണ്ടായിരുന്നു. ഹണീഷ് ഡ്രൈവിങ്ങ് സ്കൂളുമായിട്ടായിരുന്നു കൊല്ലം ദിവ്യ കൂൾ ബാർ ഫൈനലിൽ മാറ്റുരച്ചത്.
ആവേശോജ്ജ്വലമായ പോരാട്ടത്തിനൊടുവിൽ രണ്ട് ഗോളിന് ദിവ്യ കൂൾ ബാർ കപ്പടിക്കുകയായിരുന്നു.
സെമി ഫൈനലിൽ എഫ്.സി കൂത്തുപറമ്പിനെ ഒന്നിന് എതിരേ മൂന്ന് ഗോളിന് പരാജയപ്പെടുത്തിയാണ് ദിവ്യ കൂൾബാൾ ഫൈനലിൽ എത്തിയത്. സ്നേഹമെഡികെയർ കാലിക്കറ്റിനെ ഒന്നിന് എതിരേ മൂന്ന് ഗോളിന് തോൽപിച്ചാണ് ഹണീഷ് ഡ്രൈവിങ്ങ് സ്കൂൾ ഫൈനലിൽ എത്തിയത്. ടി.കെ ഭാര്‍ഗ്ഗവന്‍ സ്മാരക വിന്നേഴ്‌സ് കപ്പും ഒരു ലക്ഷം രൂപയുമാണ് ദിവ്യ കൂൾ ബാർ നേടിയത്. എം.കെ സോമന്‍, പി വാസു സ്മാരക റണ്ണേഴ്‌സ് കപ്പും അൻപതിനായിരം രൂപയും ഹണീഷ് ഡ്രൈവിങ്‌സ്ക്കൂൾ നേടി.
