സർക്കാർ അഞ്ച് പുതിയ കംപ്യൂട്ടർ ലിപികൾ പുറത്തിറക്കി. മലയാളത്തിലെ ലിപി പരിഷ്കരണത്തിന്റെ ഭാഗമായി മന്ദാരം, മിയ, മഞ്ജുള, രഹന, തുമ്പ എന്നീ ലിപികളാണ് പുറത്തിറക്കിയത്. ഇവ സൗജന്യമായി ഡൗൺലോഡ് ചെയ്ത് ഉപയോഗിക്കാം.
പിഎസ്‌സി ഉൾപ്പെടെ മലയാളത്തിൽ നടത്തുന്ന എല്ലാ മത്സരപ്പരീക്ഷകളിലും അടുത്ത അധ്യയനവർഷം മുതൽ പാഠപുസ്തകങ്ങളിലും ഏകീകരിച്ച മലയാളഭാഷാ ശൈലി നടപ്പാക്കാനും തീരുമാനമായിട്ടുണ്ട്. www.kerala.gov.in/malayalamfont എന്ന ലിങ്കിൽ നിന്ന് പുതിയ 5 ലിപികളും ഡൗൺലോഡ് ചെയ്യാം.
സർക്കാർ പ്രസിദ്ധീകരണങ്ങൾ, ഉത്തരവുകൾ, നിയമഗ്രന്ഥങ്ങൾ, ഔദ്യോഗിക രേഖകൾ ഉൾപ്പെടെയുള്ളവയിൽ ഏകീകൃത ശൈലി നടപ്പാക്കും. മാധ്യമങ്ങളിലും ഈ ശൈലി വേണമെന്നും സർക്കാർ നിർദേശിച്ചു. എഴുത്തിലും അച്ചടിയിലും പല തരത്തിലാണ്‌ ഇപ്പോൾ മലയാള ഭാഷ ഉപയോഗിക്കുന്നത്. വളരുന്ന ഭാഷയ്ക്ക്‌ ഈ രീതി ആശാസ്യമല്ല വിദഗ്ധസമിതി അധ്യക്ഷൻ കൂടിയായ ചീഫ്‌ സെക്രട്ടറി വി പി ജോയി പറഞ്ഞു.
ഏകീകൃത എഴുത്ത്‌ രീതി നടപ്പാക്കുന്നതിന്റെ ഭാഗമായി ഭാഷാ മാർഗനിർദേശക വിദഗ്ധസമിതി തയ്യാറാക്കിയ ‘ മലയാളത്തിന്റെ എഴുത്തുരീതി ’ ശൈലീപുസ്തകം സർക്കാർ അംഗീകരിച്ചു. മന്ദാരം ശൈലിയിൽ രൂപപ്പെടുത്തിയ ഈ ശൈലീപുസ്തകം glossary.kerala.gov.in എന്ന വെബ് സൈറ്റിൽ നിന്ന് ഡൗൺലോഡ് ചെയ്യാം.
