കൂട്ടപ്പിരിച്ചുവിടലില്‍ ഖേദം പ്രകടിപ്പിച്ച് ബൈജൂസ് സി ഇ ഒ ബൈജു രവീന്ദ്രന്‍
ബൈജൂസ് സി ഇ ഒ ബൈജു രവീന്ദ്രന്‍ കൂട്ടപ്പിരിച്ചുവിടലില്‍ ഖേദം പ്രകടിപ്പിച്ചു. കമ്പനിയുടെ കൂട്ടപ്പിരിച്ചുവിടല്‍ നയത്തിന്റെ ഭാഗമായി വിട്ടുപോകേണ്ടിവരുന്നവരോട് ഖേദം പ്രകടിപ്പിക്കുന്നതായും അത്രയും പേര്‍ ഒഴിഞ്ഞുപോകുന്നത് തന്റെ ഹൃദയത്തേയും തകര്‍ക്കുന്നതായും ജീവനക്കാര്‍ക്ക് അയച്ച ഇ- മെയിലില്‍ ബൈജു ചൂണ്ടിക്കാട്ടി. കമ്പനിയെ ലാഭത്തിലെത്തിക്കാനുള്ള വഴിയില്‍ വലിയ വില നല്‍കേണ്ടിവരുന്നുണ്ടെന്നും പറഞ്ഞു.
ഇന്ത്യന്‍ എഡ്യുടെക്ക് ഭീമനായ ബൈജൂസ് ആപ്പില്‍ പ്രവര്‍ത്തിക്കുന്ന 5% ജീവനക്കാരെ പിരിച്ചുവിടാനാണ് കമ്പനി തീരുമാനിച്ചിരിക്കുന്നത്. അടുത്ത വര്‍ഷം മാര്‍ച്ചോടെ നടപടികള്‍ പൂര്‍ത്തിയാക്കാനാണ് ഉദ്ദേശം. ഇതിന്റെ ഭാഗമായി 2,500 പേര്‍ക്ക് ജോലി നഷ്ടമാകും. കമ്പനിയുടെ കേരളത്തിലെ ഓഫീസിലെ ജീവനക്കാരില്‍ 100 ഓളം പേരെ പിരിച്ചുവിട്ടിരുന്നു. പിരിച്ചുവിട്ട ജീവനക്കാര്‍ തൊഴില്‍ മന്ത്രി വി ശിവന്‍കുട്ടിയെ കണ്ടിരുന്നെങ്കിലും കമ്പനിയുടെ കരാര്‍ വ്യവസ്ഥ പ്രകാരമാണ് പിരിച്ചുവിടലെന്ന് കമ്പനി വിശദീകരണം നല്‍കി.