ജാമ്യത്തില്‍ ഇറങ്ങിയ യുവാവ് കഞ്ചാവുമായി പിടിയില്‍
മൂന്നു കിലോയിലധികം കഞ്ചാവുമായി യുവാവിനെ കൊടുവള്ളി പൊലീസ് പിടികൂടി. കിഴക്കോത്ത് പഞ്ചായത്തിലെ പന്നൂരില്‍ വാടക വീട്ടില്‍ താമസിക്കുന്ന പന്നിക്കോട്ടൂര്‍ വൈലാങ്കര സഫ്ദര്‍ ഹാശ്മി (29) ആണ് പിടിയിലായത്.
റൂറല്‍ എസ്.പി എ. ശ്രീനിവാസിന് ലഭിച്ച രഹസ്യവിവരത്തെ തുടര്‍ന്ന് താമരശ്ശേരി ഡിവൈ.എസ്.പി അഷ്‌റഫ്‌ തെങ്ങിലക്കണ്ടി, നര്‍കോട്ടിക് സെല്‍ ഡിവൈ.എസ്.പി അശ്വകുമാര്‍ എന്നിവരുടെ നിര്‍ദേശപ്രകാരം എസ്.ഐ സി.കെ. റസാക്കിന്റെ നേതൃത്വത്തില്‍ നടത്തിയ പരിശോധനയിലാണ് പ്രതിയെ പിടികൂടിയത്. ശനിയാഴ്ച രാവിലെ 11നാണ് സംഭവം. പ്രതിയുടെ പന്നൂരുള്ള വാടക വീട്ടില്‍ നിര്‍ത്തിയിട്ട സ്കൂട്ട്റില്‍നിന്നാണ് കഞ്ചാവ്‌ പിടികൂടിയത്. ലോറി ഡ്രൈവറായ പ്രതി ലോക്ഡൗണ്‍ സമയത്ത് ആന്ധ്രയില്‍നിന്ന് കഞ്ചാവ്‌ മൊത്തമായി എത്തിക്കുന്ന സംഘത്തില്‍പെട്ട ആളാണ്.
കൊടുവള്ളി, കോഴിക്കോട്, കൊയിലാണ്ടി ഭാഗങ്ങളിലെ സ്ഥിരം വില്‍പനക്കാരനാണ്. വീട്ടില്‍ സൂക്ഷിച്ച്‌ ചില്ലറവില്‍പനര്‍ക്ക് കൊടുക്കുന്നതാണ് രീതി. സ്കൂട്ടറിലും ആഡംബര കാറുകള്‍ വാടകക്ക് എടുത്തും വില്‍പന നടത്തും. ഇതിന് ചെറുപ്പക്കാരുടെ വിപുലമായ സംഘവുമുണ്ട്.