രക്തദാനത്തിന് യുവാക്കൾ സന്നദ്ധരാവണം. മുഖ്യമന്ത്രി
പ്രായം 18 – 45 പരിധിയിലുള്ളവര് വാക്സിന് സ്വീകരിക്കുന്നതിനു മുമ്പ് രക്തദാനത്തിന് തയ്യാറാവണമെന്ന് മുഖ്യമന്ത്രി പിണറായി വിജയന്. രക്ത ബാങ്കുകളില് രക്തത്തിന് ക്ഷാമം നേരിടാനിടയുണ്ടെന്ന് പ്രതിപക്ഷനേതാവ് സര്വകക്ഷി യോഗത്തില് ചൂണ്ടിക്കാണിച്ചിരുന്നു. കോവിഡ് വ്യാപനത്തിന്റെ സാഹചര്യത്തില് രക്തദാനത്തിന് ആളുകള് പൊതുവെ തയ്യാറാകുന്നില്ല എന്നതാണ് പ്രശ്നം.
അതുകൊണ്ട് യുവാക്കള് വാക്സിന് സ്വീകരിക്കുന്നതിനു മുമ്പ് രക്തദാനത്തിന് തയ്യാറാവണമെന്ന് സര്ക്കാര് അഭ്യര്ത്ഥിക്കുകയാണ്. വാക്സിന് സ്വീകരിച്ചു കഴിഞ്ഞാല് ഒരു മാസത്തേക്ക് രക്തം കൊടുക്കാന് പാടില്ലെന്ന വിദഗ്ധ അഭിപ്രായം പരിഗണിച്ചാണ് വാക്സിനേഷന് മുമ്പേ രക്തം ദാനം ചെയ്യണമെന്ന് അഭ്യര്ത്ഥിക്കുന്നത്. രക്തദാനത്തിനുവേണ്ടി പ്രത്യേക ഇടപെടല് നടത്താന് യുവജന – സന്നദ്ധ സംഘടനകളും ഈ ഘട്ടത്തില് തയ്യാറാകണമെന്നും മുഖ്യമന്ത്രി വാര്ത്താസമ്മേളനത്തില് പറഞ്ഞു.