വേനല് കനത്തതോടെ കന്നുകാലികളുടെ പാലുല്പാദനം കുറഞ്ഞു
വേനല് കനത്തതോടെ കന്നുകാലികളുടെ പാലുല്പാദനം കുറഞ്ഞു. കഴിഞ്ഞവര്ഷത്തെ അപേക്ഷിച്ച് ഇക്കുറി ക്ഷീരസംഘങ്ങള് വഴി സംഭരിക്കുന്ന പാലിന്റെ അളവില് വലിയ ഇടിവാണ് ഉണ്ടായത്.
2021 ഡിസംബറിനെ അപേക്ഷിച്ച്, 2022 ഫെബ്രുവരിയായതോടെ ജില്ലയില് ക്ഷീരസംഘങ്ങള് വഴി സംഭരിക്കുന്ന പാലിന്റെ അളവില് 2.98 ലക്ഷം ലിറ്ററിന്റെ കുറവുണ്ടായി. മാര്ച്ചിലെ കണക്കിലും പാല് കുറവാണെന്നാണ് വിവരം. ജില്ലയിലെ 302 സൊസൈറ്റിയില്നിന്ന് മില്മ ദിവസവും സംഭരിക്കുന്നത് 70,000 ലിറ്റര് പാലാണ്. 1.15 ലക്ഷം ലിറ്റര് പാലാണ് ദിവസവും വിതരണം ചെയ്യുന്നത്.
ഇതില് 30,000 ലിറ്റര് കര്ണാടകയില്നിന്നും 10,000 ലിറ്റര് തമിഴ്നാട്ടില്നിന്നും 5000 ലിറ്റര് മലബാര് മേഖലയില്നിന്നും എത്തിക്കുകയാണ്. കനത്ത ചൂട്, പച്ചപ്പുല്ലിന്റെയും വെള്ളത്തിന്റെയും ക്ഷാമം തുടങ്ങിയവയാണ് പാല് കുറയാന് കാരണമായി പറയുന്നത്.
പശുക്കളെ രാവിലെ എട്ടിനും വൈകീട്ട് അഞ്ചിനും ഇടയില് തുറസ്സായ സ്ഥലങ്ങളില് മേയാന് വിടരുതെന്നതടക്കം നിര്ദേശങ്ങളാണ് പശുക്കളുടെ ആരോഗ്യവും പാല്ക്ഷമത നിലനിര്ത്താനും മൃഗസംരക്ഷണ വകുപ്പ് നിര്ദേശിച്ചിട്ടുള്ളത്. തൊഴുത്തില് വായുസഞ്ചാരം ഉണ്ടാകണം.
ഊഷ്മാവ് കൂടുന്പോള് ഭക്ഷണം കഴിക്കാന് കന്നുകാലികള് മടിക്കും. സൂര്യരശ്മി ഏറെനേരം ഏറ്റാല് കിതപ്പ്, വായില്നിന്ന് ഉമിനീര് ഒഴുക്ക് എന്നിവ തുടക്കത്തില് കാണും. രണ്ടാംഘട്ടത്തില് വിറയല്. കാലുകളുടെ ചലനശേഷിപോലും ഇല്ലാതാകാം. കൊടുംചൂടില് മരണം വരെ സംഭവിക്കാം. പശുവിന് ദിവസവും കുറഞ്ഞത് 60 ലിറ്റര് വെള്ളം വേണം. കറവപ്പശു ആണെങ്കില് ഓരോ ലിറ്റര് പാലിനും നാലുലിറ്റര് വെള്ളം അനുസരിച്ച് കണക്കാക്കണം.
പശുക്കള്ക്ക് നല്കുന്ന പരിചരണം തന്നെ എരുമകള്ക്കും നല്കാം. കൂടാതെ ദിവസവും കുറച്ചുനേരം എരുമകളെ വെള്ളത്തില് ഇറക്കിക്കിടത്താന് സൗകര്യം ഉണ്ടാക്കണം.