എടിഎം മെഷീൻ എടുത്തുകൊണ്ടു പോയി പൊളിച്ചു, എന്നിട്ടും പണം നഷ്ടമായില്ല

1. മുഖംമൂടിയും കയ്യുറയും ധരിച്ച മൂന്നംഗ സംഘം എടിഎം മുറിക്കുള്ളിൽ പ്രവേശിക്കുന്നു. കയ്യിൽ കമ്പിപ്പാരകള്‍. എടിഎം മുറിക്കുള്ളിൽ ഒരു സിഡിഎം യന്ത്രവും ഒരു എടിഎം യന്ത്രവും. 2. സംഘാംഗങ്ങളിലൊരാൾ എടിഎം യന്ത്രങ്ങൾക്കു നേരെ വച്ചിരിക്കുന്ന സിസിടിവി തിരിച്ചൊടിച്ചു വയ്ക്കുന്നു. ബാക്കിയുള്ളവർ യന്ത്രങ്ങൾ തകർക്കാൻ ആരംഭിക്കുന്നു. 3. എടിഎം യന്ത്രത്തിന്റെ പൈസ സൂക്ഷിക്കുന്ന ചെസ്റ്റ് (കാർഡ് ഇടുന്നതിനു താഴെയുള്ള ഭാഗം) കമ്പിപ്പാര ഉപയോഗിച്ചു രണ്ടു പേരും ചേർന്നു കുത്തിപ്പൊളിക്കുന്നു. മൂന്നാമൻ ഈ സമയം എടിഎം ഗ്ലാസിനടുത്തു നിന്നു പരിസരം വീക്ഷിക്കുന്നു. 4. യന്ത്രം അപ്പാടെ എടുത്തു എടുത്തു കെട്ടിടത്തിനു പുറകിലുള്ള പറമ്പിൽ കൊണ്ടുപോയി വച്ചു പണം എടുക്കാനുള്ള ശ്രമം. പണം എടുക്കാനുള്ള ശ്രമം പരാജയപ്പെട്ടു രക്ഷപ്പെടുന്നു (പൊലീസ് നൽകിയ വിവരം ഉപയോഗിച്ച് ആർട്ടിസ്റ്റ് രൂപകൽപന ചെയ്തത്).

എടിഎം മോഷണങ്ങൾ നടത്തി പരിചയമുള്ളവരാണ് സംഘമെന്നാണ് പൊലീസിന്റെ നിഗമനം. കൊരട്ടിയിലും ആലുവയിലും അങ്കമാലിയിലും നടന്ന മോഷണങ്ങളുമായി ഇതിനു സാമ്യമുണ്ട്. കൊരട്ടിയിൽ നടന്ന മോഷണത്തിൽ സിസിടിവി ക്യാമറയിൽ പതിഞ്ഞത് മൂന്നു പേരുടെ ദൃശ്യങ്ങളായിരുന്നു. എന്നാൽ സംഘത്തിൽ ഏഴു പേരുണ്ടായിരുന്നുവെന്ന് പിന്നീട് വ്യക്തമായി.  കൊരട്ടിയിലും സംഘമെത്തിയതു കമ്പിപ്പാരയുമായാണ്.

ഹെൽമറ്റ് ധരിക്കുകയും ചെയ്തിരുന്നു. വാഴക്കുളം നഗരവും പരിസരവും ദിവസങ്ങളോളം നിരീക്ഷിച്ച ശേഷമാണ് നഗരാതിർത്തിയോടു ചേർന്നുള്ള കെട്ടിടത്തിലെ എടിഎം തകർക്കാൻ ഇവർ ആസൂത്രണം ചെയ്തതെന്നും പൊലീസ് കരുതുന്നു. ഇവിടെ സെക്യൂരിറ്റി ഗാർഡില്ലെന്ന് ഇവർ മനസ്സിലാക്കിയിരുന്നു. ഇവരെത്തിയ വാഹനത്തെക്കുറിച്ചുള്ള സൂചനകൾ പൊലീസിന് ലഭിച്ചിട്ടുണ്ട്.