ബെംഗളൂരു: കര്‍ണാടകത്തില്‍ നിന്നുള്ള മലയാളികളുടെ യാത്രാദുരിതം പരിഹരിക്കാന്‍ ഇടപെടലുമായി എംപി കെസി വേണുഗോപാല്‍. കര്‍ണാടക ഗതാഗത മന്ത്രി രാമലിംഗ റെഡ്ഡിയുമായി നടത്തിയ കൂടിക്കാഴ്ചയിലാണ് കെസി വേണുഗോപാല്‍ യാത്രാ പ്രശ്‌നം പരിഹരിക്കാനുള്ള ശ്രമങ്ങള്‍ കൊണ്ടുവന്നത്. ഇതിൻ്റെ അടിസ്ഥാനത്തില്‍ കര്‍ണാടക എസ്ആര്‍ടിസി 59 അധിക സ്‌പെഷല്‍ സര്‍വീസുകള്‍ നടത്താന്‍ തീരുമാനിച്ചെന്ന് കെ സി വേണുഗോപാല്‍ വ്യക്തമാക്കി.
ക്രിസ്തുമസ് അവധിയോടനുബന്ധിച്ച് ഈ മാസം 22 ,23 ,24 തീയതികളിൽ പ്രത്യേക സര്‍വീസുകള്‍ ഉണ്ടാകും. ഇതില്‍ 18 സര്‍വീസുകള്‍ എറണാകുളത്തേക്കും 17 സര്‍വീസുകള്‍ തൃശ്ശൂര്‍ വരെയുമായിരിക്കും. കോഴിക്കോടേക്കും കണ്ണൂരേക്കും പ്രത്യേകം സര്‍വീസുകള്‍ ഉണ്ടാകുമെന്നാണ് വിവരം. ക്രിസ്തുമസ് ഉള്‍പ്പെടെയുള്ള അവധികളില്‍ ഇതര സംസ്ഥാനങ്ങളില്‍ നിന്ന് കേരളത്തിലേക്കുള്ള മലയാളികളുടെ യാത്രാ ദുരിതമേറിയതാണ്. വലിയ തുക നല്‍കി മാസങ്ങള്‍ക്ക് മുമ്പ് ടിക്കറ്റ് ബുക്ക് ചെയ്താലും യാത്ര പ്രതിസന്ധിയിലാവുന്നതാണ് പതിവ്.
