ആന്തട്ട ഗവ.യു പിസ്കൂളിന്റെ ‘വിത്തെറിയാം വിളവെടുക്കാം ‘ പദ്ധതി ഫലപ്രാപ്തിയിലെത്തി. പന്തലായനി ബ്ലോക്ക് പഞ്ചായത്തിന്റെ മഹിളാ കിസാൻ പദ്ധതിയുടെ ഭാഗമായാണ് സ്കൂളിൽ പച്ചക്കറി കൃഷി ആരംഭിച്ചത്. ദേശീയ പാതക്കരികിൽ വ്യവസായ ഗ്രൂപ്പായ മുന്നാസിൽ നിന്നും തൽക്കാലം വിട്ടുകിട്ടിയ 20 സെൻറ് സ്ഥലത്താണ് കൃഷി തുടങ്ങിയത്. 10 അംഗ എം പി ടി എ ഗ്രൂപ്പ് ആണ് കൃഷി നിയന്ത്രിച്ചത്. കുട്ടികളും കൃഷിയിൽ പങ്കാളികളായി.
മദർ പി.ടി.എ ഗ്രൂപ്പിലെ 10 പേർക്കും ട്രാക്ടർ ഓടിക്കാൻ പരിശീലനവും നൽകി. പൂർണമായും ജൈവിക രീതിയിലാണ് കൃഷി നടത്തിയത്. ഡ്രിപ്പ് ഇറിഗേഷൻ വഴി കൃഷിയിടത്തിലേക്ക് വെള്ളവുമെത്തിച്ചു. വെണ്ട, വഴുതിന, പയർ, മുളക്, ചീര എന്നിവയുടെ വിളവെടുപ്പാണ് ആദ്യ ഘട്ടത്തിൽ നടന്നത്.
വിളവെടുപ്പുൽസവം പന്തലായനി ബ്ലോക്ക് പഞ്ചായത്ത് പ്രസിഡണ്ട് പി ബാബുരാജ് ഉദ്ഘാടനം ചെയ്തു. ചെങ്ങോട്ടുകാവ് ഗ്രാമ പഞ്ചായത്ത് പ്രസിഡണ്ട് ഷീബ മലയിൽ അധ്യക്ഷയായി. ഗ്രാമ, ബ്ലോക്ക് അംഗങ്ങളായ കെ ജുബീഷ്, സുധ കാവുങ്കൽ പൊയിൽ, ഹെഡ്മാസ്റ്റർ എം ജി ബൽരാജ്, പി ടി എ പ്രസിഡണ്ട് എ ഹരിദാസ്, എം കെ വേലായുധൻ, കെ ഉസ്മാൻ , പി പവിത്രൻ , ശ്രീധരൻ കുറ്റിയിൽ, പി ജയകുമാർ എന്നിവർ പ്രസംഗിച്ചു.
