കൊടുംചൂടിനിടെ അസാധാരണ ആലിപ്പഴ വർഷം; അഞ്ചടി ഉയരത്തിൽ മഞ്ഞ്, ആശങ്ക

ആലിപ്പഴം പെയ്തു എന്നു കേൾക്കുമ്പോൾ നമ്മുടെ മനസ്സിൽ വേനൽ മഴയ്ക്കൊപ്പം ചിതറിത്തെറിക്കുന്ന ഐസ് കഷണങ്ങളാണ് ഓടിയെത്തുക. എന്നിൽ മെക്സിക്കോയിലെ ഒരു നഗരത്തിൽ സംഭവിച്ചത് ഇതൊന്നുമല്ലായിരുന്നു. ഒരു പ്രദേശത്തെയാകെ മഞ്ഞിൽ മൂടി പല നാശനഷ്ടങ്ങളും വരുത്തിയാണ് ഇവിടെ ആലിപ്പഴ വർഷം കടന്നു പോയത്.

മെക്സിക്കോയിലെ തെക്കുപടിഞ്ഞാറൻ നഗരമായ ഗുവാഡലഹാരയിലാണ് ഞായറാഴ്ച കനത്ത ആലിപ്പഴ വീഴ്ചയുണ്ടായത്. വേനലിൽ അപ്രതീക്ഷിതമായെത്തിയ ആലിപ്പഴ വീഴ്ച കൗതുകത്തോടൊപ്പം ആശങ്കയും സമ്മാനിച്ചു. നഗര വീഥികളൊക്കെയും മഞ്ഞു പൊതിഞ്ഞു. ഏകദേശം 5 അടിയോളം ഉയരത്തിലാണ് റോഡിലാകെ മഞ്ഞു നിറഞ്ഞത്.

കഴിഞ്ഞ കുറച്ച് ദിവസങ്ങളായി നഗരത്തിൽ 31 ഡിഗ്രി സെൽഷ്യസിൽ ചൂടാണ് അനുഭവപ്പെട്ടുകൊണ്ടിരുന്നത്. ഇതിനിടയിലാണ് അപ്രതീക്ഷിതമായി കാറ്റും  ആലിപ്പഴ വർഷവുമെത്തിയത്. നിരവധി വാഹനങ്ങൾ ഇതോടെ മഞ്ഞിനടിയിലായി. കനത്ത ആലിപ്പഴ വീഴ്ചയിൽ വീടുകൾക്കും വ്യാപാര സ്ഥാപനങ്ങൾക്കും നാശനഷ്ടമുണ്ടായി. ഏകദേശം ഇരുനോറോളം വീടുകൾക്ക് നാശനഷ്ടം സംഭവിച്ചു.

ആലിപ്പഴ വർഷം ഇവിടെ പതിവാണെങ്കിലും ഇത്ര കടുത്ത രീതിയിൽ അനുഭവപ്പെട്ടിട്ടില്ലെന്ന് പ്രദേശവാസികൾ വ്യക്തമാക്കി.  ഞായറാഴ്ച പുലർച്ചെയാണ് ഗുവാഡലഹാരയിൽ അപ്രതീക്ഷിതമായി കനത്ത ആലിപ്പഴ വർഷമുണ്ടായത്.ആളപായമില്ല. പലയിടത്തും അഞ്ചടിയോളം ഉയരത്തിൽ മഞ്ഞു വീണിരുന്നു.നിരത്തിൽ കിടന്നിരുന്ന വഹനങ്ങൾ പലതും പകുതിയോളം മഞ്ഞിൽ പുതഞ്ഞു. കാറുകൾ മാത്രമല്ല വലിയ ട്രക്കുകളും മഞ്ഞിനടിൽ പെട്ടു. നഗരത്തിൽ ഐസ് നീക്കം ചെയ്യാൻ തുടങ്ങിയതായി അധികൃതർ വ്യക്തമാക്കി. ഈ ഐസെല്ലാം ഉരുകി വെള്ളപ്പൊക്കമുണ്ടാകുമോയെന്ന ആശങ്കയിലാണ് ഇപ്പോൾ ജനങ്ങൾ.