മംഗലാപുരം തിരുവനന്തപുരം മാവേലി എക്സ്പ്രസ് ട്രെയിനിൽ വൻ ചോർച്ച ;സെക്കൻഡ് എസി കമ്പാർട്ട്മെന്റിലടക്കം വെള്ളം കയറി.
മംഗലാപുരത്ത് നിന്ന് തിരുവനന്തപുരത്തേക്ക് വന്ന ട്രെയിനാണ് മഴ പെയ്തതോടെ ചോർന്നൊലിച്ചത്. സെക്കൻഡ് എസി കമ്പാർട്ട്മെന്റിലടക്കം വെള്ളം കയറി.
പ്രതിഷേധവുമായി യാത്രക്കാർ രംഗത്തെത്തി. മംഗലാപുരം വിട്ട് ട്രെയിൻ കാസർകോട് എത്തിയപ്പോഴായിരുന്നു സംഭവം. കനത്ത മഴ പെയ്തതോടെ ട്രെയിനിനുള്ളിലും ചോർന്ന് ഒലിക്കുകയായിരുന്നു. വൈദ്യുതി പ്രവാഹം ഏൽക്കുമോ എന്ന ഭയത്തിലായിരുന്നു യാത്ര ചെയ്തിരുന്നതെന്ന് യാത്രക്കാർ പറഞ്ഞു.
ട്രെയിനിനകത്ത് വെള്ളപ്പാെക്കം വന്നത് പോലെയായിരുന്നു അവസ്ഥയെന്ന് യാത്രക്കാർ പറഞ്ഞു. അപ്പർ ബെർത്തുകളിൽ കയറിയിരുന്നാണ് യാത്രക്കാർ വെള്ളത്തിൽ നിന്നും രക്ഷപ്പെട്ടത്. സീറ്റിനടിയിൽ സൂക്ഷിച്ചിരുന്ന ബാഗുകളും മറ്റു സാധനങ്ങളും വെള്ളം നനഞ്ഞു.കനത്ത മഴ പെയ്തപ്പോഴാണ് കോച്ചുകളിലെ ലൈറ്റുകൾക്കിടയിലൂടെ വെള്ളം ഒലിച്ചിറങ്ങാൻ തുടങ്ങിയത്.
ഇന്നലെ മംഗലാപുരത്തേക്ക് തിരിച്ചു പോയ ട്രെയിനിലും ചോർച്ച ഉണ്ടായിരുന്നെന്ന് യാത്രക്കാർ പറയുന്നു. കണ്ണൂർ എത്തും മുൻപ് സ്ലീപ്പർ, ജനറൽ കോച്ചുകളിലടക്കം മഴ വെള്ളം ചോർന്നൊലിക്കുകയായിരുന്നു.
